Issue#2: Jan - Mar 2003

Nag-imbento sila ng di-nakikitang moog upang hindi makubkob
ng di-nakikitang kaaway.


Nagtagumpay sila.
Wala ni isang di-nakikitang barbaro ang nakita sa kanilang balwarte.


Ang kakatwa, nang lumaon, hindi na nila nakita
maging ang sarili.


Hanggang may nagsabing pantas,
nakikita ang di-nakikitang kaaway mula sa buwan.


Naihaka nilang mga di-nakikitang kaaway ang nasa buwan
at patuloy na nagmamanman.


Nakikita sila dahil sa di-nakikitang moog.
Nasa panganib sila! Nasa panganib sila!


Nagpupuyos, agad nilang giniba ang imbensiyon.
At nagsimulang magpalipad ng suntok sa buwan.