Poetry Issue 1

   Issue#1: Oct. - Dec. 2002

Bomen Guillermo


Dakilang Pantas ng Tsina


      Kumalat sa buong kaharian ang balita tungkol sa paghuhukay ng
      bundok ng matandang hangal at ng kanyang anak na si Xiaohua.
      Dumaan tuloy isang araw ang dakilang pantas ng Tsina upang magmasid sa bagay na
      kanyang nababalitaan pa lamang.
      Pangalan niya'y Zhisou... (Zhisou ibig sabihi'y matalinong tao)
      Namangha siya sa kanyang nakita kahit marami na rin siyang nakita
      Isang matanda at isang bata
      Na nagbubungkal ng higanteng bundok na makikita kahit
      mula sa buwan
      upang matanggal ito sa harapan ng kanilang bahay.
      Ilang libong taon nang naririyan ang bundok...
      Marahil diyan tayo umaakyat noong mga unggoy o bakulaw pa tayo
      Nariyan ang mga labi ng ating mga ninuno bago tayo naging tao.
      Diyan din sa kabundukan naganap ang di mabilang na digma sa kasaysayan ng tao
      Pataas pa rin ito nang pataas
      sa mga bangkay ng
      mga kawal ng
      mga sakim na emperador at hari.
      Umaagos ang mga ilog ng dugo sa tagiliran nito.
      Ano ang magagawa ng isang matandang hangal at ng
      kanyang anak?
      gaano man ngumiti't tumawa ang bata,
      gaano man kaliwanag ng kanyang mga musmos na mata.
      Sinulat ng nauulyanin na ring dalubhasa ang kanyang nakita sa isang malaki
      At makapal na aklat,
      Katabi ng tala hinggil sa pambihirang elepante:
      Isang gabundok na hayop na nakita niya noong naglakbay siya sa Indiya.
      "May mga bagay na baka maaari
      pero hindi mawari."
      bulong niya sa sarili,
      habang tumatalikod.