Poetry Issue 8

   Issue # 8: July - December 2007

Kristoffer Berse


Lungsod ng Abo


      I.
      Bumaba sa ating malay ang sugo ng takot:
      siyang nagsa-katawang-taong-tumalon-
      mula-sa-bintanang-umuusok.

      At magmula noon, unti-unti tayong nabulag
      sa mga abong kanyang ikinalat.

      II.
      May bumulusok
      at may gumuho.

      At naghalo ang alabok
      ng bato at tao.

      May namanginoon
      at nag-atas,

      “Magkaroon ng liwanag!”
      At nagkaliwanag.

      Pumailanlang ito
      Sa kaitaas-taasan

      At pagkabulusok,
      May gumuho.

      III.
      Kinabkab niya ang mga abong
      nagsa-balakubak sa kanyang bumbunan.

      Inipon niya ang mga ito sa kanyang palad
      At naglahad:

      “Sa mga alabok na ito mabubuo
      ang ating Paraiso.”

      Pagkawika’y hinipan niya ang mga ito’t
      naging itim na likido sa ilalim ng disyerto.