Poetry Issue 15

   Issue #17 : July-December 2012

Keith Bustamante



Laminar


      Hindi sa sugal na debate ng mga numero
      o sa pormulang kinokontrata ng mga letra

      nagpapakita ang aparisyon ng mga hugis
      na madalas tumatawid sa magkakaharap

      na mukha kundi sa ordinaryong pagsulpot
      ng sandaling pinipilas ng biglang-lingon

      dahil marahil sa isang bisikleta kalsadang
      sumuot sa tagiliran ng isa pang bisikleta

      isa pang kalsadang wala nang paninibago
      walang interes sa bisyo ng ibang matang

      pinaglalabas-pasukan ng mga kaluluwang
      bago pa man humalo sa usok ng sigarilyo

      matagal nang nilanghap ng mga dibuhong
      sumusuray sa purgatoryo ng panagimpan

      habang binabalasa ng bapor ang mga alon
      ng eroplano ang mga baraha sa amihan.