Poetry Issue 15

   Issue #17 : July-December 2012

Keith Bustamante



Ang Naibubukod sa Lahat ng Diyos


      Inuungusan mo ang hindi magpapahuli.
      Kung ikaw ang kawalan, mag-isa ka na

      sa mundo. Kung mag-isa, dalawa kayo.
      Kung dalawa, hindi mabibilang ang isa't

      isa. Kayo-kayo ng sa iyo ang paisa-isa
      sa pagkawala: hindi mo kayo mabilang.

      Subukan mong pumirmi, hindi na ikaw.
      Subukan mong wag magbilang, walang

      ikaw. Walang walang mawawala sa iyo.
      Kung hindi ikaw ang kawalan, sasalpok

      ka pa rin sa pag-iisa hanggang sa hindi
      mo ulit mabilang ang hindi na iba sa iyo.