Poetry Issue 16

Issue #16 : January-June 2012





      Output

      Limbo
      ni Philip Anorico

      Kung ang sanggol ay mag-isang ngumingiti,
      nakikipaglaro ito sa mga anghel.

      Sinapo sa bisig ng anghel
      ang sanggol na hindi pumalahaw
      nang mahulog mula sa kuna.

      May kapangyarihang mag-alis ng bikig
      sa lalamunan itong mga suhi
      na isinilang na una ang mga paa.

      At kung ang sariling paa ay laging inaabot,
      hinahawakan ng sanggol,
      gusto na nitong magkaroon ng kapatid.

      Nagbubuntis nang muli ang ina
      Kung ang sanggol ay laging tumutuwad
      bago matulog.

      Ang humihimbing na sanggol ay huwag
      pupupugin ng halik, kundi ay lalaki itong
      makasalanan at suwail sa magulang.

      Ipangutang ang pampabinyag upang
      mahugasan agad ang orihinal na kasalanan.

      Kung mamamatay ang sanggol na hindi binyagan
      tiyak na tutustahin ito sa lagablab ng Limbo,
      sa isang sulok ng impyerno.

      Ang pinaniniwalaang Limbo ay binawi
      ni Pope Benedict XVI noong 2007,
      nang tumutumal na ang nagsisimba’t nagpapabinyag.

      Oktubre 30, 2011
      Angono 3/7 Poetry Society
      Angono Fiesta Restaurant
      Angono, Rizal


      *

      Agam
      ni Richard R. Gappi

      Sa idlip, nalagas ang ngipin
      tila itim na paruparong dumapo
      sa hinagap ang bagabag.
      Kailangang may mabasag na baso at salamin.

      Lalupa’t kagabi, nang dumalaw
      sa isang kaibigang namaalam,
      nakalimutang maghugas ng kamay.

      Kagatin ang bato pagkagising.
      Huwag magwalis.

      Walang ligalig sa isip
      kung himbing ang panaginip.

      Oktubre 30, 2011
      Angono 3/7 Poetry Society
      Angono Fiesta Restaurant
      Angono, Rizal