Poetry Issue 16

Issue #16 : January-June 2012





      Output

      (Labahan/Nagtatampisaw ang lambat)
      ni Jonathan Tulod

                      Nagtatampisaw ang lambat
      labahan               na sumasalabid sa bumubulang
                      tubig-alat. Hampas sa bawat
                      pag-gaod ang bigat ng mantas
                      sa hiblang pilit humuhulagpos
                      sa laylayan ng pagkabata.

                      Sa wakas, abot-tanaw ko na
      planggana           ang lawak ng dagat. Sakop ko
                      ang dayametro ng mundo.
                      Dito ako gagalaw, dito ako mananahan.
                      Dito na marahil iikot ang pag-asang
                      lisanin ang paglisan.

                      At sa pagdalisdis ng tubig sa
      gripo                  mga di-mawaring liko at pihit
                      ng buhay, patuloy akong
                      magpapaanod sa alon
                      at muli’t muling tatangkaing
                      sisirin ang misteryo kung bakit
                      may linyang humahati
                      sa langit at lupa

      *

      Ang Paggawa ng Rebulto
      ni Love Joy Raza

      Mga Sangkap

      1L tubig                   Patuloy ang paghahanap ng dahilan sa kawalan ng kakayahan
                            na mag-akla ng mga kaganapan. Paulit-ulit na mga kasagutan
                            mula sa mga tiga-bangon. Lahat ito hindi maitala. Lumilipas
                            sa ala-ala. Tinatangay ng bawat minuto. Hindi naiipon.

      1.5 kg cement          Ang mga sugat sa likod dulot ng araw-araw na paghilata,
                           nagnanaknak. Nagmumulmol. Nangangalas. Nagiiwan ng
                           mga kaliskis sa sapin at punda. Nabubuhay na naaagnas,
                           isang mirakulo at anomalya.

      grade 4                   Ang pagsuko ng katawan at isip, at pagkapagod ng mga tiga-
      aggregates               bangon lahat naibaling sa araw na tinanggap ang anting-
                           anting. Ang pangakong hindi tatablan ng kahit anong
                           patalim at pampukol,lunukin lamang ang holen.
                           Binabalot ng kaligara. Binabalot ng tanda.

      concrete mixer         Pinatawag ang albularyo. Nagbitiw ito ng panalangin at
                           ibinuka bibig ng nakahilatang walang muwang sa mga
                           kaganapan.Pinainom ng timplang lunas sa parusa ng buhay na walang
                           katapusan. Bendidong tubig, pinulbong dahon, at paminta.

      concrete                  Bago pa maganap ang paghanggan sa pangako. Pinatawag
                           ang pari at pinasubuan ng ostia. Ang balita natagpuang
                           matigas na ang matanda ng may ostia sa dila.


      *

      (Toothbrush /Doon sa kaparangan)
      ni Dave Tolentino

      toothbrush              Doon sa kaparangan, sa pagtirik ng mata bandang alas tres ng
      na pudpod              hapon sumasayaw ang mga dahon ng kogonsa mamasa-
                          masang lupa. Sa gitna ng masukal at madawag na lugar na
                          dating taniman ng kamote at tubo, dinig ko ang pag-ungol ng di
                          ko kilalang ibon. Doon kami nagtalop.

      panghilod                Mahirap kamutin ang balat kapag sumasayad sa mga damong
                           ligaw. Makakapa ko sa may bandang tagiliran ang niyog na di
                           pa nabubunutan. Pero nakapagtatakang walang sawa ang
                           hangin sa paghagod nito sa gulugod ng nakatiwangwang na
                           araro. Wala siyang pakialam sa ipupukol sa amin.

      sabon                      Swabe ang alatiit ng mga sangang nababali sa sabayang pag-
                           igtad. Sobrang dulas ng leeg niya’t di ko magawang igtingan
                           ang pagkakakapit.Ngunit sa panahong yao’y naging mabango
                           ang amoy ng mga “amor seco ”. Ngunit sabay sa samyo ng
                           pag-ibig ay ang malansang amoy ng sardinas.