Poetry Issue 15

   Issue #15 : July-December 2011

Franz Joel Libo-on



mula sa Butil ng Hangin


      Ilang Dekada sa Ilang Sandali


      Binalot ng segundo
      Ang buong araw.
      Sa palad nanatili
      Ang nilukot na hangin.
      Nasa matang pasara
      Ang paglubog ng araw.
      Pumatak sa pisngi
      Ang pinigang sandali.
      Nasa buntong-hininga
      Ang pagsigaw.
      Nasa gitgitan ng ngipin
      Ang pagngiti.
      Nasa paninigas ng katawan
      Ang pagnanais gumalaw.
      Nasa kuwadradong bintana
      Ang daan pauwi.