Poetry Issue 15

   Issue #15 : July-December 2011

Mesándel Virtusio Arguelles



mula sa Aralin sa Kasaysayan


      Mga guho ang mga salita.
      Mga labí bago pa man
      mahulog mula sa guwang
      tungo sa isa pang guwang.

      Dito lang ito, hanggang ngayon,
      maaaring magmarka. Manatili
      hanggang walang kahulugan
      na hindi nagbubura. Mga borador

      lahat ng isinulat. Itinuturo
      ang muli’t muling pagsisimula
      sa walang wakas. Inihuhulog
      sa daungan ang sorpresa ng pulang araw.