Issue # 14 : January - June 2011

Nikka Osorio

Pakiusap
Sa Exhibit

Pakiusap

Hindi tiyak kung igagalang niya
ang mungkahi na mahahayag
sa pagbuklat sa kuyom ng rosas.

Sa isip niya, may lihim
na ikinakalas
sa marikit na buhol,

laberinto, maselang bulaklak
na inuusisa ng sariling nagnanais
marating ang ubod.

Sabihin mo,
patatawarin, hindi patatawarin.

Sa Exhibit

Nakaharap ang ilang bisita sa larawan.
Mainit ang pag-uusap nila nang mapadaan ako
at tulad nila, napahinto sa harap ng obra.
Napahinto sandali at nagpatuloy sa paglakad.
Naputol ang pangungusap.
Nawawari kong sinusundan ako ng tingin
na hindi ko ibinabalik.
Ang mga salita? Naulinigan ko silang muli
nang nasa harap na ako ng ibang kuwadro.

Sa sinasakyang bus pauwi, nakatingin
si Yves Tanguy sa labas at nakita sa bintana
ng gallery ang ilang obrang
paglao’y napag-alamang kay de Chirico.
Nahulihan lamang niya ito ng sulyap
sa sandaling nabinbin ang bus bago nagpatuloy
sa biyahe. Nakauwi siya’t nagtimpla ng pintura
sa paleta upang matingnan ang nadarama
niyang nakatingin sa kanya.