Puno ng pagdurusa ang pagsasalita
Hindi ako makatulog
Hindi ako makatugon sa pader ng tanong
Hindi ako makasagot kahit simple ang tanong
Paulit-ulit ang mga tanong
Ilanlibong boltaheng tanong
Isang timbang tubig na tanong
Itim na plastik sa ulo ang tanong
Hindi ako makahinga
Instrumento ng tortyur ang tanong
Binubugbog ako ng mga tanong
Anong maisasagot bago ang hininga’y malagot
Pagsasalita ang kinakailangan
Ilang salitang makapagpapalaya
O bulag na pagpapaubaya
Ang pag-amin ang ekstraksiyon ng amen
Sa patlang ang buntong-hininga
Sa dilim ng isip ang tinig ng konsensiya
Ang ilusyon ng mundo sa labas
Aliwalas ng araw-araw na lumilipas
Nagdadalawang-isip ang isip
Ang una’y hinagap ang ikalawa’y naghahanap
Oyayi’t kundiman
Kundi man laing at tuyo
O orkidya sa kabundukan
Mahalinang ambisyon mapanganib ang bisyon
Dumuduro ang daliri sa sapot ng gambala
Hindi malirip
Hindi mawawaan
Ang dulo ng dulo sa bigwas ng pendulo
Ng kahoy ng tubo ng kamao
Sa ulo sa likod sa tagiliran sa hita sa batok
Sa sikmura pasakit na hindi masikmura
Bawat palahaw nakagigimbal na mura
Sa pagsasanay ng katawan sa walang-katuwiran
Sa balanse ng hustisya ang hustisya
Wala sa sentro
Nawawala ang sentro
Hindi ako makatayo
Hindi ako makatulog
Mula sa loob may nagpinid ng bintana
May nagpatay ng mga kandila
May paparating na bagyo
Ang multo ng hinaharap
Ang kagandahang ayaw pag-usapan ang panaginip
Ng kagandahang ayaw pag-usapan
Usap-usapan ito ngayon
Dito dito mismo
Sa yungib sa dibdib ng lungsod
Sa bagong Lungsod ng Tao
Ang makatao na hindi makatao
Sa panahon ng Dakilang Libro
Ng salitang higit pa sa salita
Ang monumento sa kadakilaan ng tao
Testamento sa kadakilaan ng bisyon ng tao
Habang sa labas ang tagapaghatid ng balita
Ang nangamatay sa araw-araw
Hindi na ito bagong balita kahit araw-araw ito ang bagong balita
Pagpapanibagong-hugis pagpapanibagong-bihis
Ng di-pangkaraniwan bilang karaniwan
Ng katawang sinasanay sa walang-katuwiran
May daliring dumuduro sa sapot ng gambala
Walang nakaliligtas sa salakay ng konsensiya
Sa pagbabalanse ng hustisya
Kung magpapaubaya kung magtitiwala
Walang mawawala kung maniniwala
Parating may bagyong paparating
Natural lang na ang isara ang bintana
