Poetry Issue 11

   Issue # 11: January-June 2009

Frances Moreen Naputo



Psychiatric Ward


      Liham mula sa Isolation Room



      Hindi maaari ang panulat dito. Pandagdag daw
      ng pilat. Sa pader na lamang. Sa isip.

      Pudpod na ang mga kuko. Ikinulong ako rito dahil
      nagsasayaw ulit ako kagabi. Ibinukod sa aking kapwa

      upang manatili silang buhay. Ang nais kong aminin,
      ginawan ko sila ng kuwento dahil hindi nila ako naririnig.

      Nagdarasal ako sa pader, nakikipagtalik sa anino kapag naglalaho
      ito sa gabi at idiniriin kong sila ang may sala. Kung hindi

      sa mga kuwento, paano pa ako makapagsusugat.
      Walang salamin sa loob ng silid.