Paisa-isa pipindutin mo
para palakihin sa iyong harap
mga larawan ng katawan
na mariin ang kapit sa ari:
bawat isa kanya-kanyang
panunuya na uunahan ka
sa sukdulan bagamat
walang isa na mapagnasahan.
Saan ibabaling ang tingin
kung pinugutan na ng ulo
ang walanghiyang katawan
ng sariling kahihiyan?
Walang katawan ang mukha ng ligaya.
Nakikita ka kahit wala silang mga mata.
