Poetry Issue 10

   Issue # 10: July-December 2008

Allan Popa



Baboy


      Malalasap pagbigkas ng baboy kung bakit baboy
      ang mababasaging alkansiyang hindi nagawang

      mapabigat bagamat matabang-mataba sa iyong palad.

      Pinakinggan mo ang pag-alog sa kahungkagan
      ng iilang sensilyong naihulog sa mabintog na tiyan,

      tiningala’t sinilip ang dilim sa napakakitid na butas.

      Matatandaang ito ang gulang ng pagtuklas ng sarap
      sa pagtuklap ng langib ng papahilom na sugat.

      Nakapaglalaway, nakapangingiwi ng mga labi

      ang pagsungkit, pagkupit ng pilak mula sa sarili
      na mariing maikukuyom sa nangangati mong palad.

      Malalasap pagbigkas ng baboy kung bakit baboy.