interview Issue 5

   Issue#5: July - December 2005

Mesandel Virtusio Arguelles



Si Hesus at si Maria ng Magdala


      Isang hapon nagbalik siya sa pook na iyon.
      Doon binuhay ng kaniyang pag-ibig si Lazaro.
      Doon siya nanangis. Ipinaghanda nila siya ng hapunan

      kasama ang iba pa. Muli nagsilbi si Marta.
      Samantala kumuha si Maria ng mamahaling
      langis at ipinahid sa mga paa niyang mahirap

      sundan ang mga yapak. Lumuhod siya
      sa kaniyang harapan, inililis ang laylayan ng kasuotan
      ng guro, at maingat na iniangat ang kaniyang

      bawat talampakan. Ihinaplos niya ang langis
      mula sa sasapnan ng sandalyas, sa bukong-bukong,
      hanggang sa binti: Nadama niya wari sa kalamnan

      ang pagod sa kaniyang mga paglalakad nang mag-isa.
      Nang hindi siya kasama. Nang kaniyang idampi
      ang nakalugay niyang buhok para tuyuin ang langis

      na humahalimuyak sa buong bahay, halos natiyak
      na hahanapin niya ang katawan ng panginoon
      hanggang pagkatapos ng takdang kamatayan.