interview Issue 3

   Issue#3: April - June 2003

Allan Popa

Arkeolohiya


      Malaon nang naghuhukay ang mga siyentista.

      Maingat nilang tinitibag ang lupa at sinasala

      Ang buhangin upang walang mawaglit

      Na pirasong muling magbibigay-liwanag sa nawalan

      Ng laban sa pagtabon ng mahabang panahon.

      Isang araw, tumama ang aparato sa matigas na bato.

      Nabunyag ang bilugang sahig na tila entablado.

      Walang ano-ano, nagsalita ang isang eksperto

      At winika ang isang linya mula sa dula ni Sophocles.

      Nakaumang ang kaniyang piko sa mga ginulat

      Na kasamahan habang inililibot ang paningin.

      Nagtawanan sila at nagpatuloy sa paghukay

      Bagamat waring may natumbok na kaba sa lahat.

      Naitatag nila sa ligid ang mga guho ng isang malawak

      Na larangan. Nabakas din nila ang duguang altar.

      Hindi dumulog ang diyos sa pusong huling inialay.

      At gumuho, gumuho ang naglalakihang mga bato.